Trio 2024

Prins Herm II

Leef Moeraskwaakers en Moeraskwaakerinne,

Heej bin ik dan, intelik meug ik mich aan óg veurstelle. Prins Herm d’n II

Ik bin de zoon van Hay en Mieke van Rijn en ’t ‘kleine’ breurke van Chiel en Bas. Gebaore en getaoge in ’t Bultenven op de Richardswaeg.
Inmiddels 45 jaor jónk. As klein menke druimde ik d’r al van um Prins te waere. Ik heb dan ouk hiel waat daekes as mantel umgehange en d’r zien hiel waat krante gevouwe tot ‘n prinsemuts. De pollaepel waas dan miene scepter. ‘nen Droum dae dit sezoen werkelikheid geit waere.
’t Bultenven heb ik inmiddels verlaote. Dit heb ik ingeruuld veur ‘n fijn hoes in ’t Ven –centrum. Same mit mien vrindin Charlot en ós leve dochter Sien woeëne weej op de Gerrittewaeg.
In ’t dageliks laeve werk ik beej tuinbouwloeënbedrief Jenniskens in Hors. Heej werk ik al haos 6 jaor mit hiel vuuel plezeer. Elken daag is anders en det mak det ik mien werk zoeë leuk vind.
In miene vrejen tied gaon ik gaer waat bölkes rake beej ’t Akkermansgilde op de Hei. En dao drink ik neteurlik ouk gaer ‘n glaeske beer. Vaerder bin ik ein van de dragers van ós Venlose stadsreuze Flujas en Guntrud.

Van kinds aaf aan bin ik ‘nen echte vastelaovesvierder.
Vruger ging ik mit pap en mam en mien breurs op stap in ’t Ven beej de Sabbel. Weej bleve altied wies det miene pap haos in slaop veel taege de paol, dae in ’t kefee stónd. As weej zoge det ’t haos zoeë wied waas, dan makde weej ós oet de veut. Pap en mam kóste ós dan neet vinde en dan kóste weej nog waat langer blieve.
Op latere laeftied vierde ik vastelaovend in de stad, maar as d’r in ’t Ven waat te belaeve waas, leet ik dao mien gezich uteraard efkes zeen.
Ouk heb ik jaorelang groeëte wages gebouwd. Ik trok dan mei mit d’n optoch in de stad en in Blierick. Veur de Vensen optoch waas de wage jaomer genóg noeëts op tied klaor…
Noow heb ik mienen drei gevónde beej de Jeugkemissie. Ik haop det de Vense jeug net zoeë kin genete van de vastelaovend as ik det altied heb gedaon en uteraard nog steeds doon.

Vastelaovend same!

Adjudant Dave

Leef bewoeëners van ‘t Kwaakersriek,

Beej deze wil ik mich gaer efkes aan óg veurstelle. Miene naam is Dave Buskes, zoon van Jan Buskes † en Marian Baur. Ik bin gebaore en getaoge in Blierick, wao ik vruger altied as Wortelepin in ‘t Muspelheim rónd rende. Op mien 21e bin ik nao de Postflat in Venlo verhoes.
In 2006 heb ik mien maedje, Leonie, liere kinne op ‘t slotconcert van Rowwen Hèze. Same hebbe weej in 2008 ‘n huuske in Lómm gekoch, wao weej zien getrouwd en wao later ouk ós döchter, Iva en Nola, zien gebaore. 5 jaor geleje hebbe weej d’r veur gekaoze um in ‘t stedje te gaon woeëne en zien neergestreke op de Gerrittewaeg in ’t Ven, wao weej mit hiel vuuel plezeer idderen daag thoeskómme. ‘n Paar maond naodet weej ós hadde gesetteld, kwame Herm, Charlot en Sien naeve ós woeëne en ware weej vanaaf daag ein vrinde veur ‘t laeve.

Ik bin vollierd banketbekker en heb jaore beej Patisserie Broekmans aan de van Leeuwenhoekstraot gewerk. Bijna 10 jaor geleje heb ik ‘t roer volledig umgegoeëjd en bin ik aan de slaag gegaon beej Fun Valley in Mestreech, ónderdeil van de Hermans Groep. Vanoet Mestreech bin ik 4 jaor geleje euvergevlaoge nao Maasbree, wao ik idderen daag op vekansie gaon. Ik werk noow namelik as Manager Receptie beej Vekansiepark Breebronne. Heej staon ik mit vuuel enthousiasme aan de receptie klaor veur alle gaste, maar regel ouk achter de scherme alle zake die mit ‘t vekansieplezeer van ós gaste te make hebbe.
In miene vrejen tied speul ik gaer ‘n spelke op de computer en um mien kónditie op peil te halde ren ik geregeld ‘n rundje door ’t Ven. Vaerder vertoeve weej mit ós gezin en mien schoeënelders regelmaotig in ózze caravan op camping de Heldense Bossen, gaon weej d’r gaer ‘nen daag op oet, örges ‘n hepke aete of hebbe weej ‘ne gezelligen aovend mit vrinde, waobeej ‘n spelke speule neet meug óntbraeke.

Vastelaovend viere haet beej mich ‘ne hielen tied op ‘n lieëger pitje gestaon, maar sinds’ne gas jaor gaon ik weer gaer op de joets. Same mit de kinder viere weej vastelaovend in ’t Ven en in ‘t stedje van lol en plezeer. Mit ózze vrindegroep loupe weej ouk nog altied mei in de groeëten optoch van Lómm.

Wie bezónder is ‘t um noow same mit Hoeëgheid Herm II, Adjudant Jeroen, ós dames en kinder dit jaor de vastelaovend zoeë te meuge belaeve. Same mit óg gaon weej d’r ‘ne geweldigen tied van make!

Adjudant Jeroen

Gojendaag Moeraskwaakers en Moeraskwaakerinnekes,

Gaer stel ik mich aan óg veur: ik bin Jeroen van Dijk. Zoon van Wim en Riet van Dijk-Coenen. As echte Venlose jóng gebaore op de Herungerstraot. Op mien 2e  verhoes nao Holt-Blierick en op mien 24e weer truuk nao Venlo gekómme. Ik woeën noow al ‘n hiel aantal jaore in ‘t Ven.
Ik bin gelökkig getrouwd mit Lusanne Kempen, ‘n ech Tegels maedje. Gruuetse pap bin ik van Sophie van haos 14 jaor, Eva van 12 jaor en Sien van haos 2 jaor. Weej woeëne op de Straolsewaeg in ‘t Moeraskwaakersriek.

Mit de 15 jaor bin ik as weekend- en vekansiemeiwerker begós in de kwekerie van Huub Leurs op de Schaopsdiekwaeg. Nao verscheie functies binne ‘t bedrief gehad te hebbe, werk ik noow as inkuiper van blome en plante veur ‘t tuincentrum aan de klok beej veiling Rhein-Maas in Herunge en aaf en toe riej ik ouk op de vrachwage.

Vastelaovend is mich mit de paplaepel ingegaeve. In vrugere jaore in Holt-Blierick, wao ik ouk mei deej mit d’n optoch. Later in ‘t stedje van lol en plezeer wao ik ouk aan de Venlose en Vensen optoch deilnoom. Al ‘ne gas jaor zit ik in de optochkemissie van de Moeraskwaakers en sinds inkele jaore maak ik ouk deil oet van de Raod van 11.

In de vrejen tied dae euverblief, fiets ik gaer en ónderneem ik leuke dinger mit mien vrouw en kinder.

Óntzettend gruuets bin ik um same mit ózze Prins Herm II en adjudant Dave dees schoeëne vereiniging veurop te meuge gaon dit jaor.

Vastelaovend same!

Proclamatie

Weej, Prins Herm d’n Twieëde,

  1. Zoon van Hay van de Griezendiek en juffrouw Mieke van de Gemmaschoeël
  2. ‘t Batje van de Richardswaeg
  3. Groeëten bink van zien hertje Charlot
  4. Gruuetse pap van allerleefste Sien
  5. Beschermhier van de Kwaakers aan de viever beej de Gerrittewaeg
  6. Ouk waal bekind as optochcoureur
  7. BBQ meister, maar dan waal op kaole
  8. Te herkinne aan de charmante bein van stadsreus Flujas
  9. Alleskinner beej de Jeugkemissie
  10. D’n besten hakker van ’t Moeraskwaakersriek
  11. Hierser van alle tuinbouw-kes in Noord-Limburg en wied dao boete

Beej de gratie van Vors Moerassius en ziene hoeëge wieze Raod van Elf, 48e Prins euver ós Moeraskwaakersriek in ’t jaor 2024, beejgestaon door mien kwante Adjudante Dave en Jeroen, gaeve heejmei te verstaon en te weite aan idderein dae de Vense vastelaovend ’n werm hert toedruueg:

  1. Det weej same mit óg straole in ’t Kwaakersparedies
  2. Det weej as wieste Moeraskwaakerstrio oeëts, vuuel meuge kwake en springe
  3. Det weej alle Vense jeug mei meuge trekke in ’t vastelaovesgedruus
  4. Det weej mit alle Vense minse ’n glaeske meuge drinke
  5. Det weej euveral, wao ’t fees ouk is, ‘ne greun-gaele glood achter meuge laote
  6. Det weej meuge genete van ‘ne zónnigen iersten optoch van Groeët Venlo
  7. Det weej same mit ’t Jeugkwartet door de buun meuge zakke
  8. Det weej mit ós leedje ’t ganse Ven op stelte meuge zette
  9. Det weej op ‘t Sterrepad mit vaderlik advies ‘n wieze vastelaovesles meuge gaeve
  10. Det weej mit ós kwante hippe altied as letste nao hoes zulle gaon
  11. Det weej op Aswoensdaag truuk meuge kieke op ‘ne geweldige vastelaovend same mit óg!

Motto

Weej as Trio oet ’t centrum van ’t Ven
Halde waal van joeks en jen

In ‘n kleurriek Kwaakersparedies
Zien weej mit zien alle gans van de wies

Weej bouwe ’n fees mit jónk en ald
Dus zet det beer maar ves kald

Vastelaovend same!