KwATS
’t Waas al ‘nen tied ’n flinke ónder- en baovehuidse irritatie, ergernis van de bäöveste plank en de letsten tied zelfs ‘ne daoren in ’t oug.
As Trio beej de Moeraskwaakers kriegs se euveral veurrang. Beej ‘t nao binne gaon, beej ‘t kloeke, beej ’t wc-bezeuk. In ’n jaor tied kriegs se op allerhande plekke de vaere gestaoke.
Maar….
Nao ‘t aaftraeje wuurt d’r van dich verwach det se toch nog ‘n paar jaor as Raodslid mei duis. En daonao?
Daonao. Dan bis se gewoeën lid. Niks bezónders.
En det kós neet langer zoeë!
Mertónderzeuk, leje-enquête, behooftepeiling. Alles in ‘t werk gesteld um te bewieze det d’r ‘n noeëdzakelik laeve is nao ‘t Triojaor. Mit behölp van de sikkertaris, AIVD, Interpol en aanverwante geheime deenste, is d’r ‘ne lies óntstaon van alle Trio’s sinds de oprichting van de Moeraskwaakers, noow mier dan 44 jaor geleje. Umdet d’r al ‘n vereinigingsvorm waas en de Trio’s van de aafgeloupe jaore baeter verdene, is beslaote tot de oprichting van ‘n Sociëteit. Dit haet mier cachêt (oet te spraeke as: kashjê).
Nao oetgebreide planning en korrespóndentie vónd op 15 juli 2016 de oprichtingsvergadering plaats van: Kwaakers Ald Trio Sociëteit.
‘n Twiefelend begin. Aevel, de aanstaekelikheid bleek groeët. Binne de kortste kiere hadde zich 60 leje aangemeld beej de Sociëteit. Waorechtig woort heej dus waal veurzeen in ‘n sluimerende behoofte.
‘n Dergelike Sociëteit vruueg ouk um leiding. En zoeë woort d’r ‘n kómpetentieprofiel opgesteld. ‘n Kemissie van wieze manne geformeerd. Gesprekke geveurd.
Dit rissulteerde in de beneuming van ‘ne Praeses (veur ‘n gewoeëne vereiniging is de titel “veurzitter” genóg). Mit groeët draagvlak en enthousiasme woort de beneuming van Peter Linders (Adjudant Peter, 2000) tot Praeses aangenaome. De Praeses wuurt beejgestaon door ‘nen Administrateur (veur ‘n gewoeëne vereiniging is ‘ne sikkertaris genóg). Dit in de persoeën van Richard de Grood (Prins Richard I, 2003). ‘ne Penningmeister is neet nuuedig. Gezeen ‘t kassaldo van vandaag zal nemes d’r mit de kas vandoor gaon.
‘n Speciale kemissie haet zich bezig gehalde mit ‘t óntwerp van ‘n logo veur dees Sociëteit. Nao intensieve bespraekinge haet ouk dees Sociëteit zien eige, herkinbare logo.
‘n Zichzelf respecterende Sociëteit haet neteurlik ouk ’n Hoeshaldelik Reglement. Dit, wies noow toe geheime document, wuurt dan te pas en te ónpas toegepas. Um ‘n tipke van de sluier op te lichte: “beej óntstentenis van de Praeses wuurt deze vervange door de Administrateur. En dit Vice Versa. Zien allebei dees functionarisse neet beschikbaar: dan gebeurt d’r niks!”
De Sociëteit haet inmiddels ‘n paar kier acte de présence gegaeve. Beej ‘t aafscheid van Vors Frank en Sirremoniemeister Peter en uteraard beej de receptie van de Trio’s vanaaf 2017.
Helaas waas de herkinbaarheid as Sociëteit nog neet waat ‘t zien meus.
Nao ‘n oetgebreide creatieve fase haet dit geleid tot ‘t óntwerp van ‘ne sjaal. Kiek heejveur nao de aafbeelding ónderaan de teks.
De Sociëteit haet, dankzij ‘t veurbereidend werk van speciale werkgroepe, ouk al de ierste Sociëteitsmiddage en –aovende kinne belaeve.
De Moeraskwaakers zien mit de toevoging van de Kwaakers Ald Trio Sociëteit noow ‘n kómplete vereiniging, waovan zeker is det dit ónderdeil van de vereiniging in idder geval jaorliks zal gaon greuje.
…….KwATS
Richard de Grood
Administrateur i.o.e. (i.o.e: in ónderling euverleg, kónform ‘t nog neet gepubliceerde Hoeshaldelik Reglement)
