Trio 2026

Moeëje minse oet ’t Kwaakersland,

Waat is dit spannend, maar baovenal tóf, det ik same mit mien Adjudante Ruud en Sébastien ’t Trio 2026 meug vorme in ós moeëje Kwaakersriek. Gaer wil ik michzelf aan óg veurstelle. Miene naam is Joey Hooper, 35 jaor en dit jaor heb ik de ier um Prins te zien van de Moeraskwaakers.
Ik bin de zoon van Charles en Ineke Hooper, breurke van Lesley en broor van Demi. Same hebbe weej ós jónge jaore doorgebrach as gezin in Blierick. Toch kwaam ik toen al mit einige regelmaot in ’t Ven um beej miene kammeraod Ruud op bezeuk te gaon of same ’n beerke te drinke beej de Sabbel. Toen ik same mit mien vrouw Joëlle op zeuk waas nao ’n hoes, zien weej ind 2015 gevalle veur ’t oetdagende klushoes op de Schoeëlwaeg in ’t Ven. Nao 2 jaor van verbouwe, zien weej in ós stulpke getrokke. Ózze groeëtsten trots zien ós kinder Josh, Jordan en Jonná. Josh wuurt op 1 fibberwari 6 jaor en meug deze verjäördaag op de ker in de Vensen optoch staon. Jordan is net 4 gewaore en meug deze speciale vastelaovend mit ós belaeve en tegeliekertied ouk beginne aan zien schoeëlavontuur op ’t Sterrenpad. Jonná is 2 jaor en is nog gezellig beej ós thoes.
In ’t dageliks laeve bin ik tegelzetter. Meschiens kint geej mich waal, umdet ik beej óg ’n tegelke thoes heb geplek of umdet geej mich heb zeen rieje door de Vense straote mit mien buske. Vaerder speul ik gaer ’n poetje padel of ren ik ’n rundje door ’t Ven richting de hei. Naodet ik zelf altied heb gevoetbald, gaon ik noow mit miene zoon mei nao ’t voetballe beej FCV, wao ik dees groeëte hobby vanoet ‘nen andere kant kin belaeve.

Weej gaon genete van ‘ne kei specialen tied, same mit óg. Want vastelaovend is vastelaovend same. Noow is ’t tied
veur trammelant in ’t Kwaakersland.

Schoeëne vastelaovend same!

Adjudant Ruud

Adjudant, waat ’n ier!

D’r is mich gevraog um mich veur te stelle aan óg en det doon ik dan ouk beej deze. Ik bin Ruud Reinders (43 jaor ald) oet de Michaelstraot, wao ik al 40 jaor woeën. Iers mit mien elders Laura Odenthal en Wil Reinders en mit mien breurkes Davy en Nico. Dae letste is trouwes nog Jeugprins gewaes van de Moeraskwaakers in 1999. Later mit mien vrouw Carine Wijnen en ós dreej kinder Jamie van 14, Joëlle van haos 12 en Jagger van 9 jaor, dae trouwes ouk dink dat hae 14 is.
Nao lang veur ‘ne werkgaever te hebbe gewerk, heb ik de keuze gemak um vurrig jaor mien eige bedrief as bouwbegeleider te starte ónder de naam Bouwbegeleiding Venlo. Waat meide dankzij ‘nen houp andere enthousiaste óndernemers steeds mier kleur krieg. Taeves verzörg ik ’n gedeilte van ’t technische behier van Vastgoedbeheer Venlo.
In miene vrejen tied, van waat d’r nog van euver is, gaon ik nog altied gaer mit vrinde op paad. ’n Festivalletje, de Parkfeeste, ’n hepke en drenkske, aovendje pokere, vastelaovend viere of op vrindeweekend en nog legio andere fijne geneugte. Vuuel van die vrinde kómme oet ’t Ven en weej hebbe same in de jaore ’90 ‘nen houp trammelant veroorzaak in ’t Ven. Weej neumde ós de Vatos Locos en det zien weej nao al die jaore nog altied.
Vaerder bin ik enthousias supporter beej Delta veur ós dochter Joëlle, det in de ónder 12-1 hockeyt en fervent aanhanger beej FCV van de jo15-1, wao ózzen aldste zoon Jamie beej speult. Ouk help ik gaer mit training en coaching gaeve beej de jo10-3 van FCV, wao ózze jóngste zoon Jagger voetbalt en waat ’n geweldig team is det um veur te meuge staon.
Mien relatie mit d’n Hoeëgheid (waat veur mich gewoeën Hoopertje is) geit hiel wied truuk. Jaore hebbe weej same gewerk en dao is ’n echte vrindschap oet óntstaon. Mit miene collega Adjudant gaon ik ouk hiel wied truuk. Weej zien immers ouk de aldste van dit Trio en zien persies op dezelfden daag gebaore. Nao in vuuel skivekansies same mit zien zus en elders, moeëje herinneringe gemak te hebbe, gaon weej ouk van dit avontuur ’n fantastische herinnering
make.

Fijne vastelaovend allemaol!

Adjudant Sébastien

Heej bin ik dan: adjudant Sébastien Mattioni.

De zoon van Philippe en Irmgard, ouk waal bekind in Venlo van destieds Chez Philippe. En breurke van Angela 💫. Ik bin gebaore op 14 jannewari 1983 in Tilburg, maar flot genóg in Venlo kómme woeëne.
Ik veul mich dan ouk ‘nen echte Venlose jóng. Ik bin mit mien vrouw Fieke inmiddels al ruum 14 jaor same en daovan zien weej 8 jaor getrouwd. Same hebbe weej 2 kinder, dochter Danaë van 8 jaor en zoon Manu van 4 jaor. Weej woeëne neet in ’t Ven maar in Venlo-Noord, nog gen 500
maeter van ’t Ven aaf. Maar ós kinder zitte waal allebei op ’t Sterrenpad op schoeël, dus weej zien gen ganse vraemde in ’t Ven.
Sinds jannewari 2025 bin ik mien eige riejschoel gestart ónder mienen eige naam Rijschool Sébastien Mattioni. Dit geit super good en ik bin hiel bliej det ik deze stap heb dörve zette. Geej zult mich vas waal al ens hebbe zeen rieje in miene tóffe Volkswage Taigo mit as kenmerk ’t greune klavertje veer 🍀.
Waat zal ik nog mier aan óg vertelle: mien hobby’s zien lekker same op vekansie gaon, same nao festivals en skië mit mien vrinde. Weej genete dan ouk volop van ’t laeve mit ’n hepke en ’n drenkske.
Ik zoel zegge: weej gaon d’r mit zien alle ‘ne super leuke vastelaovend van make, mit Prins Joey I en Adjudant Ruud!

Kwante vastelaovend en santé!

Motto

Gaef ós de sleutel van ’t moeëje Ven.

Dan knalle weej ’t daak d’r aaf mit dees clan.

Noow staon weej garant, veur waat d’r gebeurt in ’t Kwaakersland.

Weej viere ’t laeve en gaon noow zeker alles gaeve.

Vastelaovend same!