Martin Billekens, Moeraskwaaker van ’t Jaor 2025
Op 30 november 2025 is op d’n Haciënda in ’t Ven, Martin Billekens, baeter bekind as El Martino, gehöldig tot Moeraskwaaker van ’t Jaor 2025.
Beej zien waekelikse bezeuk aan zien broor Hans woort hae, ónder binnekóms van ‘Op eine haciënda achter in ’t Ven’, verras door femilie en ‘n aafvaardiging van ‘t bestuur van de Moeraskwaakers.
Mit deze ieretitel erkint ‘t bestuur van de Moeraskwaakers zienen bezónderen inzet veur de gemeinschap van ’t Ven en Venlo en umgaeving.
Martin, óndertösse 72 jaor jónk, steit bekind as de draodaezelende troubadour. Zien passie veur zinge zörg veur lachende snuutjes en bringk ónder andere al jaorelang joeks en jen op de jeugmiddage van de Moeraskwaakers, beej andere vereiniginge, in verzörgingstehuzer en fietsend op d’n draodaezel neteurlik veur idderein. In de regio Venlo wuurt zien enthousiasme zier gewaardeerd. ‘t Interview mit d’n Umroop in 2022 is dao ‘t bewies van.
Martin geneet van de kleine dinger in ‘t laeve, zoeëas ‘n simpel bezeukske aan McDonald’s mit zien (klein)kinder en wet altied ‘ne positieven drei te gaeve aan iddere situatie. ‘Waat hebbe weej ’t toch good’ en ‘Det vrit gen broeëd’ zien gevleugelde oetspraoke van um. Ouk wuurt hae dök gevraog of hae det waas dae stónd te zinge of fietsend al zingend veurbeej kwaam. Steevas is dan zien antwaord: “Det is mien broor”.
Zien ónoetwisbare aanwezigheid wuurt meide gevoed door ziene fanetieke sportieven inzet bij Basic-Fit, wao hae altied al vruug in de morge of baeter nach (02.30/03.00 oor) te vinde is mit zienen eige meigebrachde meziek.
Martin is gehech aan zien thoes in ‘t Mariadal, umringk door zien deerbare spullekes en plentjes. Hae is ‘nen echte femilieman en haolt vuuel gruuetsigheid en gelök oet zien kinder en kleinkinder.
As vaste zenger beej de Kwaakerrun, de Moeraskwaakers en andere aevenemente, wet hae idderein te laote lache en zich te ammezere. Op de jeugmiddaag is hae smeis d’n aafsloeter, same mit de kinder hossend en springend de tent op de kop zette. Zienen humor, zien wermte, zien good gemuts zien en doorzettingsvermeuge make um tot ’ne gewaerdeerde mins in de Vense gemeinschap.
Veur ziene jaorelangen inzet en ‘t touvere van glimlache op snuutjes, is Martin terech beneump tot Moeraskwaaker van ‘t Jaor 2025. De vereiniging dank um hertelik en haop det hae zien mezikale en sociale beejdrages nog lang geit veurtzette.
Van herte gefilliciteerd, Martin/El Martino, de Nachtegaal van ’t Ven!
Names bestuur van de Moeraskwaakers,
Vors Moerassius
‘Op eine haciënda achter in ’t Ven, woeënt de dochter van Don Tinus in de kieperen, ai ai ai ai ai ai ai.’
