Gen Trio en Jeugkwartet in 2021

Óndanks storme in ’t aafgeloupe sezoen en ‘t verzette van de Vensen optoch hebbe weej de vastelaovend volwaerdig kinne viere. “D’r zoot weer joeks in de lóch!”

15 maart jóngsleje kwaam heej vervolges, as gevolg van COVID-19, abrup ‘n ind aan en is “sociaal aafstand halde” de norm, zoeëlang weej gen vaccin hebbe.

Dit haet idderein  getroffe en mit name de horeca, cultuur- en aevenementesector zien  heejdoor financieel zwaor gerak, óndanks financiële tegemootkómming vanoet de Nederlandse euverheid.

‘t Bestuur haet neteurlik de maotregels róndum COVID 19 nauwlettend gevolg en kiek veuroet nao ‘t aankómmende sezoen 2021. Recent is nogmaols gekeke nao de (ón)meugelikheje um dit volwaerdig te kinne organisere.

Belangriek oetgangspunt is ‘t veuroetzich op ‘n vaccin. De autoriteite op dit vlak verwachte momenteel neet ierder as midde veurjaor 2021 ‘n vaccin te hebbe. Dit beteikent det idderein in ‘t vastelaovessezoen 2021 gehalde is aan de COVID-19 maotregels (1,5 m aafstand halde, zitte in horecagelaegenheje, neet zinge enz).  Ouk de ónzekerheid euver ‘ne meugelike 2e lockdown helt ós in de greep.

Mit dees oetgangspunte en um op tied dudelikheid te gaeve, haet ‘t bestuur in ing euverleg mit de Triokemissie beslaote um kómmend sezoen gén Trio 2021 oet te rope, aangezeen weej dit neet op ‘n COVID-19 veilige, maar ouk waerdige meneer kinne aanbeje aan ‘n Trio.

Ouk de jeugkemissie zal um dees raeje gen Jeugkwartet en Jeug Rv11 oetrope in 2021.

Activiteite zien neet te realisere op de gebroekelike wies in ós Residentie. Ouk bezeuk aan zustervereiniginge mit ‘n Trio in eur Residenties zal neet meugelik zien zónder de geldende regels róndum COVID 19 nao alle waarschienlikheid te euvertraeje.

‘t Bestuur kin en wilt neet toestaon det tiejes dergelike activiteite besmettinge óntstaon.

Aevel, de vastelaovend 2021 zal doorgaon. Um de meugelikheje  veur ’t Ven te verkinne is al mit ós Residentie gespraoke. De Feeszaal haet aangegaeve, uteraard binne de geldende regels, same de meugelikheje te bekieke. De ierste ideeë zien al same mit de Residentie óntspraote.

In de kómmenden tied zulle de meugelikheje mit en door de verscheie kemissies  verkend en ónderzóch waere, waobeej weej neteurlik ouk ós Residentie zulle betrekke.

Ideeë zien heejin welkóm en kinne ingebrach waere beej bestuurs- en kemissieleje. Same kinne weej, binne de geldende regels, ‘ne bezóndere vastelaovend organisere.

Creativiteit, eige aan de vastelaovend, zal zier zeker nuuedig zien en die is volop aanwezig binne ós vereiniging en kump in meujlike tieje altied baove drieve. Mit ós motto veur 2021 “’t Ven pak oet” zal dit tot verrassende oplossinge leie, is ós vaste euvertuging.

Uteraard stumme weej ouk mit ós zustervereiniginge aaf waat weej meugelik waal same kinne organisere, maar waal passend binne de COVID-19 maotregels.

Names ‘t bestuur van de Moeraskwaakers haope weej op óg begrip en gaon weej same kieke waat weej dit kómmende vastelaovessezoen 2021 waal kinne organisere.

Blief gezónd!!

Truuk