In Memoriam – Remco Vercoulen – Hoeëgheid Remco I † 30-09-2025
Vuuels te jónk, vuuels te vruug.
Weej zien d’r stil van.
Wie ónierlik kin ’t laeve zien.
Intens bedreuf zien weej door ’t haergaon van d’n hier Remco Vercoulen, in de bleuj van zien laeve op 29-jaorige laeftied ten gevolge van ’n noeëdlottig óngeval.
Hae is veur ieuwig Prins van de Moeraskwaakers 2025. Hae ging dit jaor “van Straole nao ’t Ven “ mit zien Adjudante Jim en Tom same mit eur dames Jenny, Pien en Merel.
Hae waas ‘n gerespecteerd lid van vrinde- en wagebouwersgroep de Losse Flodders, die al jaore meitrekke in de optochte van ’t Ven, Velde, Blierick en Venlo.
Maar Remco waas mier as allein ‘ne vereinigingsmins.
Hae waas gruuetse pap van Baer en Ties, echgenoeët van Jenny en meide kertrekker van femiliebedrief Vof Vercoulen.
En baove alles ‘ne kammeraod, dae veur idderein klaor stónd. Gengmaker beej zien vrinde en altied in veur “oetgaons” fratse wao nog lang euver woort en wuurt naogepraot.
‘ne Laevesgeneter dae dao alles oethaolde waat d’r in zoot. In de letste waeke haet hae nog moeëje oetstepkes gemak mit zien gezin, femilie en zien vrinde die um leef zien.
AKG (alles kump good) waas ziene liefspreuk, dae ouk al jaore beej de Moeraskwaakers geldt. 30 september 2025 kwaam ’t helaas neet good veur um. Vuuelste vruug is hae ós óntnaome, waat misse weej um noow al!
Weej zulle Remco, alias VOF / Rem, misse en gedinke um as ’ne neuchtere, enthousiaste, vrintelike, sociale mins mit ’n groeët (vastelaoves)hert, dae vol euvergave en veur de volle 100% euveral veur ging. Niks waas oeëts te vuuel veur um.
Weej winse Jenny, zien zeuns Baer en Ties, zien elders Peter en Hilda, Mandy en vaerdere femilie, zien vrinde en bekinde hiel vuuel sterkte mit dit inmens groeëte verlees.
Rös zaach Remco.
“Dien ster steit al te straole en de herinneringe aan dich blieve gelökkig veur altied.”
’t Ven – Moeraskwaakersriek, 1 oktober 2025
Names alle leje van vv de Moeraskwaakers
Bestuur vv de Moeraskwaakers