Prins Harrold I

Leef  Moeraskwaakers en Moeraskwaakerinne,

Heej bin ik dan, Prins Harrold d’n Ierste.
Geej kint mich meschiens as de zoon van Harry en José Thijssen. Al 25 jaor eur goldstök.
Nao jaore thoes gewerk te hebbe beej ós slaajkwekerie, bin ik in 2020 mede-eigenaer gewaore en de veerde ginneratie slaaj van Thijssen in ‘t Ven.
Sinds kort hebbe weej  ‘n gans niej bedrief opgestart in Duitsland, wao alles automatisch geit.
Vaerder bin ik door de Moeraskwaakers groeët gebrach in de Vense vastelaovend en heb ik jaore door de feeszaal gerend. In 2010 bin ik ouk nog ens Jeugsirremoniemeister gewaes.  Nao hiel waat jaore blieke de vaere mich toch baeter te staon.
Same mit ózze wagebouwersgroep De Losse Flodders heb ik ’n groeët aantal jaore de Vensen optoch schoeëner meuge make mit ós prachtige wages en pakke.
In miene vrejen tied maak ik gaer de witte bókse van FCV vettig op de plak en fungeer ik as de handrem van FCV 8, wao ik ouk aaf en toe mien geulkes mei pak. Same mit mienen Adjudant Ray voetbal ik al vanaaf de F-jes en Adjudant Lex hebbe weej beej de dansschoeël weggetrokke um beej ós team te voge.
Dreej Jaor geleje heb ik mien maedje liere kinne. Vastelaovend struimp beej um ouk door ’t blood.
Ik heb um toen mit de Boerebroelof um verkiering gevraog.
Sinds kort bin ik woeënechtig in ózze Haciënda achter in ‘t Bölteven same mit mien maedje Clarissa en ózze beschermhier Flow.

Adjudant Lex

Gojendaag, ik zal mich efkes veurstelle aan óg. Ik bin Lex Lokkart. Zoon van John en Mireille Lokkart. Gebaore en getaoge in Venlo en via FCV bin ik bekind gewaore mit de schoeënheid van ’t Ven en de Vense vastelaovend. In 2019 mit de Kers bin ik mien maedje Jackie taege gekómme waomei ik same begin 2021 nao Mexico bin verhoes. Midde 2022 zien weej truuk gekómme mit ózze kielf Taco. Nao flinke koppien van al die fiësta’s en Tequila woort ’t tied um truuk te gaon nao ’t stedje van lol en plezeer, waobeej weej in Velde terech zien gekómme. Weej woeëne op de Oude Heerwaeg. Mit ózze wagebouwersgroep De Losse Flodders zien weej al dökker door de straote van ’t Ven getrokke en hebbe weej ouk waal ens de stampofoon in óntvangs meuge neme (waovan weej op ‘t moment neet weite wao dae is). In ’t dageliks laeve werk ik as Contract Specialist beej DSV. ‘ne Waereldwieje Transport- en Logistieke deensverlieëner, waobeej ik verantwaordelik bin veur ‘t behald, de tevrejeheid en greuj van klante.
In miene vrejen tied doon ik gaer ‘n belke trappe mit de jónges van FCV 8, wao Harrold en Ray ouk deil van oetmake. Ik vind ‘t kei sjiek, nao ‘ne langen tied en ‘n aangepasde vorm van vastelaovend aafgeloupe jaor, det ik ónderdeil meug zien van ’t Trio en dees kwante vereiniging. Mit d’n Hoeëgheid Harrold en Adjudant Ray gaon weej d’r ‘ne joeksigen tied van make!

Adjudant Ray

Beste Kwaakers,

Miene naam is Ray Rutten, zoon van Jac en Monique Rutten. Ik bin woeënechtig in ’t Ven, um persies te zien “zoeëmaar veur de jen, zoeëmaar veur de jen in ’t Bölteven”!
In ’t dageliks laeve werk ik in d’n bouw, wao ik verschillende klusse oetveur. In de weekende bin ik veural in de kantine beej ‘FCV’ te vinde, wao ik sóms ens van de barkrök aafstap um de plak op te renne veur taege d’n bal te schöppe. Same mit mienen Hoeëgheid, Adjudant en neteurlik ós speulers van ‘t 8e perbere weej iddere waek zoevuuel meugelik punte richting ’t Ven te hingele. Mit as groeëte doel um kampioen te waere en de platte ker op te gaon mit as kers op de taart die badjasse die ózze Prins Harrold ós belaof haet beej ‘n kampioenschap.
Boete ’t voetballe bin ik ouk ‘ne Formule 1 leefhebber. Ik perbeer alle races van de racekalender oeëts nog ‘ne kier beej te woeëne, maar dao heb ik nog efkes d’n tied veur nuuedig.
Vaerder vind ik ’t leuk um te duike, dit perbeer ik ‘n bietje miet de F1 tripjes te kómbinere. In de winter staon ik t leefste op de latte en as ik vrejen tied heb, pak ik dökker de motor um ‘n rundje te toere.
Ouk heb ik op de Gemmaschoeël gezaete (taegeswaordig ‘t Sterrepaad). Toen in 2008 heb ik ’t gelök gehad um Jeugprins te meuge waere  beej de Moeraskwaakers. ‘ne Hiele schoeëne vastelaovestied heb ik toen belaef.

En dan noow de belangrieksten tied van ‘t jaor! De vastelaovend! Dit is mich mit de paplaepel ingegaeve. Al veurdet ik kós loupe, leep ik al mit d’n optoch mei. Same mit verschillende Vense femilies trokke weej door de Vense straote. Later heb ik ouk nog as faatse meigeloupe en ‘n paar kier mit waat kammeräöj. Totdet ‘t moment kwaam, det weej mit de kammeräöj op ‘ne 11de van de 11de beslaote hadde um mit ‘ne groeëte wage mei te doon as De Losse Flodders. Waat ‘t ierste jaor begós mit ‘n simpele beerkrat, woele weej al flot serieuzere en moeëjere wages gaon make um in de prieze te valle. ’t Kós allemaol neet gekker, weej zoele en meuste zoeë groeët meugelik zien, de meiste meziek op de ker hebbe, zoeëdet ze ós euver de päöl nog kóste hure en genóg drank beej ós hebbe um idderein langs de kant dreej kier achterein zat te laote waere. En as weej dan nog neet groeët genóg ware, dan kwaam d’r waal weer ‘nen tractor teveurschien dae weej gans inbouwde.
Noow det ik dit jaor mei meug gaon op de prinseker, kin ik miene reeks van geloupe optochte doorzette!
Same mit óg gaon weej d’r waat moeëjs van make en beej deze wil ik idderein ves ‘ne schoeëne vastelaovend winse!

Proclamatie

Weej, Prins Harrold d’n Ierste,

1. Zoon van slaajkeuning en ald Adjudant Harry en Moeraskwaakersleedzangeres José.
2. Veerde ginneratie slaajkweker van ‘t Ven en euver de päöl.
3. Gekmaker van de feeszaal, vruger al same mit mien breurke en zusse.
4. Beschermhier euver daen Haciënda op de Kikvorsstraot, same mit nemes minder as ald Adjudant Hay Thijssen beej ós achter in d’n haof.
5. Goldstök van mien maedje Clarissa.
6. Ouk waal bekind as Harie handrem van FCV 8, dae die witte bókse vettig mak.
7. Leefhebber van die glazer Spa gold.
8. 11x Vensen optochlouper van ‘t Rio Trio, Altied Wat en de Losse Flodders.
9. Wónderschoeëne schoeënzoon van ald Vors Volièrus Cay.
10. Gruuets baasje van ózze wildebras Flow.
11. Altied wakker te make veur lol en gekke jen.

Beej de gratie van Vors Moerassius en ziene hoeëge wieze Raod van Elf, 47e Prins euver ós Moeraskwaakersriek in’t jaor 2023, beejgestaon door mien kwante Adjudante Lex en Ray, gaeve heej mei te verstaon en te weite aan idderein dae de Vense vastelaovend ‘n werm hert toedruueg:

1. Det weej mit óg in ‘t duuster zulle straole.
2. Det weej mit ós leedje in de top 555 meuge kómme te staon.
3. Det weej de badjasse binne meuge hengele beej FCV 8.
4. Det weej neet op de buun kinne staon zónder ‘n glaeske beer.
5. Det weej mit ‘t Jeugkwartet vuuel remmiedemmie meuge make.
6. Det weej mit d’n optoch van ’t Ven net zó’n schoeëne wages meuge bewóndere wie veurgaonde jaore.
7. Det weej as jóngste Moeraskwaakerstrio oeëts same vuuel meuge kwake en springe.
8. Det weej tiejes de vastelaovend boete de lienkes kleure.
9. Det weej mit óg de Residentie zulle sloete.
10. Det weej mit de jas aan d’r nog eine meuge drinke.
11. Det weej idderein bedanke veur deze schoeëne vastelaovend.

Motto

Weej zien ’t Trio van de Kwaakers
Van die remmiedemmiemakers
Weej kleure ’t laeve
Vastelaovend is ós mit de paplaepel ingegaeve
In ‘t duuster doon weej nog straole
Mit óg wille weej ‘t beste oet deze vastelaovend haole
Dus pak óg ‘n glaas beer, det zeen weej gaer
Vastelaovend same