v.v. de Moeraskwaakers

Motto 2021:
‘t Ven pak oet

Trio 2020

Dave heej, tied um mich efkes veur te stelle aan zeej die mich nog neet kinne. Ik bin Dave Noldus en woeën mit mien schoeëne maedje, Ineke en ós twieë blage, Nigel en Jools op de Nazarethstraot, dao wao dae zich kruuts mit de Noordervaartlaan. Ik bin van oeërspróng ‘nen Blierickse, maar kóm al sinds mien 18e in ‘t Ven vanwaege det Vens maedje waomei ik dus ouk inmiddels alweer 11 jaor gelökkig getrouwd bin. Beej mien schoeënelders, Truus en Wiel óntging mich al maar weinig van waat d’r allemaol speult in ‘t Kwaakerriek. Ik bin dan ouk al ‘n tiedje kind aan hoes in ‘t Ven en nao waat umwaeg in Venlo en Blierick zien weej dan sinds 2017 ouk intelik in ‘t Ven neergestreke. De blage zien allebei op ‘t Sterrepaad terech gekómme en weej zien allemaol mit ós neus in de bótter gevalle in de Vense gemeinschap.

Ik bin zoeë jónk wie ik mich veul, maar mót toch ech bekinne det ik lets augustus de 40 meugde aantikke. Stil zitte kin ik neet zoeë good en ik bin dan ouk eigelik altied waal bezig mit van alles en nog waat. Ik klus gaer in en róndum ós huuske en d’r is eigelik ouk dao boete neet ech iets wao ik neet aan mei wil doon. Van feesjes regele mit vrinde tot klusse op ‘t schoeëlplein, van de Moeraskwaakers wies de Kwaakerrun. As d’r waat te doon is, bin ik d’r gaer beej. En as det beteikent det ik zelf de hand oet de mouwe mót staeke um te zörge dét d’r waat te doon is, bin ik dao eigelik altied waal toe bereid, as ‘t maar gezellig wuurt. Kortum, as beej ós thoes d’n agenda laeg is hebbe weej ‘n foutje in de planning gemak…

Ik werk beej de pliesie heej in ‘t stedje van lol en plezeer. Ik doon dao allerhande projekmatige dinger in en róndum ‘t bureau en bin zoeë aaf en toe ouk nog waal ens op zó’ne strepewage te vinde. Ik bin daoveur ‘ne Jan gewaes, oftewaal beej de Marechaussee en daoveur had ik zelfs zó’n greun pekske aan mit van die vlekke d’r op. Ik bin waat se neums ‘nen echten euverheidsmins. Det heb ik van miene pap, Niek, georve dae det ouk waas, maar helaas in 2006 is euverleje. Mien mam, Hermien, woeënt mit eure vrind Peter in Blierick, wao ouk mien broor mit zien gezin zich definitief gevestig haet.

Daonaeve sport ik gaer en veural hardloupe vind ik leuk, umdet mien andere leefde, de formule 1 neet veur mich is weggelag. Dae kiek ik dan maar op TV. Sinds vurrig jaor bin ik ouk in de Raod van Elf ingestap en ouk heej geit vuuel van mien plezeer haer. Ik bin neet van ‘t beer, ( jao jao ik weit ‘t…) maar van de Radler en kin mich dao prima mei ammezere. Zoeë bin ik ouk aan mien Adjudante gekómme wao ik gruuets op bin. Kwant vind ik ‘t det weej ós gezellige borrelaovende noow mit ‘t ganse Ven meuge deile as ‘t Trio van 2020!

Gaer stel ik michzelf aan óg veur. Ik bin Rik Linck, zoon van Pum Linck en Tonia de Groene, gebaore in 1983 in de moeëjste stad van Zieëland: Middelburg. ‘ne Zieëw van hoes oet dus, maar waal mit ‘n tropisch tintje, aangezeen mien roots ouk in Indonesië ligge. As ein van de weinige heej bin ik neet opgegreujd  mit Vastelaovend. Op 17-jäörige laeftied bin ik nao Breda verhoes en dao bin ik ‘n jaor later Sandrijn taege gekómme, waomei ik inmiddels 18 jaor gelökkig bin. Weej hebbe 2 prachtige kinder, Mila van 9 en Mees van 7. Dankzij Sandrijn bin ik besmet gerak mit ‘t Vastelaovesvirus, mienen ierste Vastelaovend in kefee de Loco is d’r ‘ne um noeëts mier te vergaete. Ik kós en begreep gen inkel  leedje, maar had toch d’n tied van mien laeve. De sfeer in de stad, de saamhurigheid en de meneer wao op minse mit ein ‘t laeve viere, mak veur mich de Vastelaovend ‘n uniek fees. In Breda heb ik Carnaval liere viere, maar in Venlo heb ik Vastelaovend liere viere!

Sinds 2012 woeëne weej in ’t Ven op de Noordervaartlaan en vanaaf daag  1 veule weej ós heej as gezin óntzettend thoes. Weej hebbe hiel vuuel leuke minse liere kinne en de kinder greuje heej op in ‘n geweldige umgaeving. In ‘t dageliks laeve werk ik as New Business Manager veur CTAC, ‘n ICT bedrief det zich rich op softwareoplossinge veur retail, groeëthandel, productiebedrieve en woeëningcorporaties. Ik bin verantwaordelik veur de verkoup van softwareoplossinge aan nieje klante door ‘t ganse land.

Det ik dit jaor ónderdeil oet meug make van dit prachtige Trio, same mit ózzen Hoeëgheid Dave en Adjudant Marco (waovan ik altied verleer op de squashbaan) is ‘n geweldige ier. Ik kin neet wachte um d’r mit óg allemaol ‘ne fantastische Vastelaovend van te make.

Gaer stel ik mich efkes veur. Ik bin Marco Theeuwen, zoon van Hay en Mien Theeuwen. Gebaore in de Kroeënenberg maar al flot verhoes nao d’n Bookend. Dao bin ik as ‘ne Worteleschrabber opgegreujd. Mit vrinde hebbe weej in die umstreke vuuel Vastelaovend gevierd, mit name ’t bouwe van groeëte wages en daomet trekke in d’n optoch waas ‘n jaorliks truuk kómmende happening. In miene studentetied kreeg ik veur ’t iers te make mit Kwaakers: maar dan die van Oeteldonk. In daen tied heb ik ouk mien moeëj, leef Geijsters maedje meuge liere kinne, Anneke. Nao de studietied en ‘n paar jäörkes Venlo-Zuud is det kwake mich schienbaar good bevalle, want in ós huweliksjaor hebbe weej ós huidige stekske in ’t Ven gekoch. Inmiddels kwaak ik alweer 13 jaor vanaaf de Noordervaartlaan en hebbe weej óndertösse dreej prachtige blage meuge kriege: Rens (11), Fenne (9) en Jasper (6).

In ’t dageliks laeve bin ik werksaam as bouwkosteadviseur beej Benker en gaef advies in koste róndum bouwprojekte. Van ’t begruuete van woeëningrenovaties wies ‘t inzichtelik make van investerings- en exploitatiekoste van ‘n kómpleet niej ziekehoes wies aan de ónderhandeling mit de aannemer. Ik vind ‘t allemaol erg leuk um te doon!

Miene vrejen tied bestaej ik ónder andere gaer aan sport: oftewaal ik gaon mit mien ‘ald-buurmanne’  kieke nao mien klubke VVV, danwaal staon ik as teamleider beej Rens (FCV JO12-2) naeve de kant te blère of ik gaon mich zelf in ’t zweit werke mit squashe of trek mich de hardloupschoon aan. De derde helf meug dao neteurlik neet aan óntbraeke.

Vaerder steit neteurlik same leuke dinger doon mit ’t gezin veur mich op nummer ein! Ouk Vastelaovend viere doon ik gaer same mit Anneke en de kinder, weej viere det gaer in ’t Ven. Ik bin gruuets det ik dit jaor, same mit Dave en Rik, mei veurop meug gaon beej de Moeraskwaakers! Weej gaon d’r ‘n moeëj fees van make!

Proclamatie

Weej, Prins Dave d’n Ierste,

  1. Zoon van dae hiel erg gemisden euverheidsmins Niek en veurmaolig verkoupkenón van Daagblaad de Limburger, Hermien.
  2. Beste, knapste, leefste en toevallig ouk insigste schoeënzoon van dae knutselkeuning van Océ, Wiel en die leve loupende gezet van Gipmans, Truus.
  3. Gruuetse pap van miene grutste kleine vrind Nigel en mien eige Vastelaovesjoeksmesjien Jools.
  4. Echgenoeët van dae spetter van ‘n maedje en mien leefde, Ineke.
  5. Beschermhier van dae steinplak op de Nazarethstraot.
  6. Raodslid van de Raod van Elf van de Moeraskwaakers.
  7. Mins zónder rös in de vot of ech beer in de hand.
  8. Plannemaker van d’n boeventempel op de Rienbaekstraot.
  9. Geneter en procesbewaker van al waat gezellig is.
  10. Knutselaer van Vastelaovespekskes wies in den treure toe.
  11. ‘ne Prins dae schaelere wazel oetkraomp dan det hae groeët is.

Beej de gratie van Vors Moerassius en ziene hoeëge wieze Raod van Elf, 46e Prins euver ós Moeraskwaakersriek in ’t jaor 2020, beejgestaon door mien kwante Adjudante Rik en Marco, gaeve heejmei te verstaon en te weite aan idderein dae de Vense Vastelaovend ’n werm hert toedruueg:

  1. Det weej as Trio d’r gruuets op zien um veurop te meuge gaon in de Vense Vastelaovend.
  2. Det weej de joeks oet de lóch zulle haole en in óg hand zulle gaeve.
  3. Det weej haope óg zoeë dök wie meugelik te meuge zeen en spraeke dees daag.
  4. Det weej de goje veurbeelde van Luc, Eric en Robin meuge volge.
  5. Det ‘t Sterrebal en d’n Trujenaovend ein groeët circus meuge waere!
  6. Det weej ‘t Ven oet zien voge wille zeen barste van plezeer.
  7. Det weej zoeë hard mit de muziek mei gaon bralle det zeej in Zieëland nog van ‘t duin aafvalle.
  8. Det weej óg mit ‘t Jeugkwartet meuge laote genete van ‘ne waan Vastelaovend.
  9. Det weej ‘t waer van vurrig jaor meuge hebbe veur ózze schoeënen optoch.
  10. Det weej heej neet zoele staon zónder de ónveurwaardelike steun van ós maedjes.
  11. Det weej ‘t circus det Vastelaovend het gaon veurzeen van al waat joeksig is!

Motto Trio 2020

Mit joeks in de lóch
en de piste vol mit jen,
prissentere weej ós aan óg
as Moeraskwaakerstrio oet  ’t Ven!
Weej gaon d’r vol taegenaan,
dus sloet gezellig beej ós aan!
Welkóm in ’t circus det Vastelaovend het!
Vastelaovend same!