v.v. de Moeraskwaakers

Motto 2019:
Drei mit ós mei

 

 

Prins Luc I

Meug geej mich nog neet kinne, ik bin Luc Driessen. Gebaore op de Paulus Potterstraot en opgegreujd in ’t Ven. Ik bin ‘ne zoon van de Prins van 1992 en ald-veurzitter Sjaak en Jeanne. Dan weit geej al det de Vense Vastelaovend mich waal mit de paplaepel is ingegaeve.
Mit 32 jaor laeveservaring  woeën ik sinds vurrig jaor net boete ’t Ven op de Henri Uyttenbroeckstraot.

In ’t dageliks laeve bin ik wiekverpleegkundige beej Greune Kruuts Thoeszörg, de Zörggroep. Dao werk ik in twieë verscheie teams. ‘t Team van Arce, Lómm en Velde en ‘t team gespecialiseerde verpleging Noord-Limburg. Vaerder bin ik vurrig jaor begós aan de Academie veur Chinese Geneeswieze Qing-Bai.

Sinds 2017 bin ik lid van de P&P kemissie en ónderhald ik same mit Bart Jacobs de website van dees schoeëne vereiniging. Ouk bin ik lid van de Raod van Elf en staon mien vader vaerder al hiel lang beej as dae mit ’t nieje Trio bezig is. Dae vruueg altied: “ wae zoels dich Prins make?” Det dae mich dit jaor in de kroeg belt mit van wils dich noow kómmend jaor Prins waere had ik effe neet in de gater.

In miene vrejen tied bin ik ‘ne gas kier per waek te vinde beej Crossbox 077. In de linte en zomermaonde is ‘t meugelik det geej mich veurbeej zeet kómme op miene racefiets. Vaerder drink ik gaer ‘n glaeske beer mit mien kammeräöj en laot ik heej en dao mien danskwaliteite nao veure kómme.

Gruuets bin ik det ik same mit mien Adjudante Eric en Robin, waomei ik al kammeraod bin vanaaf ózze luiertied, veurop meug gaon in de Vastelaovend van 2019.

Adjudant Eric

Efkes veurstelle, ik bin Eric Hegger, gebaore op d’n Arenborgwaeg in ’t Ven. Ik bin ‘ne gerdeneerszoon van Jan en Yvonne Hegger. Zeej hebbe mich de Vastelaovend mit de paplaepel ingegaeve.

Ik bin al ruum 9 jaor same mit ‘t Braobantse maedje Boukje van der Werf en woeënachtig in de sportiefste stad van Nederland ….. Helmond.

Ik bin werksaam as Consultant beej NovaCropControl. ‘n Ónderzeuks- en tescentrum gespecialiseerd in plantsapmaetinge. Ik gaef advies euver ‘t optimalisere van de bemesting, zoeëdet de plant ónder mier gezónder en weerbaarder taege ziektes en plaoge wuurt.

Minse zulle mich veural kinne van ‘t fietse.  Ik heb jaore op verdeenstelik niveau gemountainbiked. Heej bin ik twieë jaor geleje mei gestop. Dit kosde op ‘n gegaeve moment tevuuel tied en energie wao op ik nao ‘n nieje hobby ging zeuke. Ouk iets waat ik same mit Boukje kós doon. Dit bleek salsa danse te zien. Van stieve herk tot los in de häöpe. Mit vuuel passie dreie weej noow ore in de waek rundjes op de dansvloer. Taeves drei ik as Dj Duo Penotti same mit ‘ne salsacollega Latinmeziek op salsafeeste.

Vaerder halde Boukje en ik d’r van um de wieje waereld in te trekke mit as favoriete kóntinent Zuid- Amerika.

Ik bin lid van de Raod van Elf van de Moeraskwaakers en bin gruuets  det ik mit Prins Luc en Adjudant Robin de ker meug trekke dit Vastelaovesjaor!

Adjudant Robin

Ik bin Robin Knickelbein,  zoon van Heinz en Judith en gebaore in ‘t St. Maartens Gashoes. Ik bin opgegreujd op de Huiskensstraot wao ik wies óngevier mien 18e laevesjaor gewoeënd heb. Nao ‘n aantal jaore aafwezigheid bin ik hiel bliej det ik sinds vurrig jaor weer truuk in ‘t moeëjste stadsdeil van Venlo woeën.

Ik heb al vanaaf de  crèche beej  De Groethof meigedaon aan ‘t feesje det Vastelaovend het en waas nog lang neet van plan um dao mei te stoppe. Taeves kin ik Luc en Eric al vanaaf dezen tied en kinne weej dus gerös zegge det weej ouk vanaaf dezen tied altied same Vastelaovend hebbe gevierd.

Ik werk op de aafdeiling Performance Control beej KLG Europe op Trade Port en ik hald mich veurnamelik bezig um te kieke wao weej as verveurder verbaeterslaeg kinne make. Grafieke make en in Excel aankloeëte vind ik tóf um te doon.

Qua sportiviteit bin ik al 25 jaor lid van FCV en momenteel betrokke beej de A1. Op zóndaag voetbal ik nog altied in t 3e van ’t Ven. In ‘t veurjaor en de zomer bin ik zier regelmaotig te vinde op miene racefiets.

Vaerder bin ik behalve lid van de Raod van Elf ouk actief in de sponsorkemissie um te helpe waarborge det weej nog jaore kinne feeste mit de Moeraskwaakers.

Proclamatie

Weej, Prins Luc I
Zoon van ald-Prins en ald-veurzitter Sjaak en Jeanne
Beschermhier van de Henri Uyttenbroeckstraot
Raodslid en lid van de P&P kemissie van de Moeraskwaakers
Groeët oetslover aan de halters op de fitnessplak
Barón van de injectienaolde
Fanetiek lierling beej Qing-Bai
Geneter van ‘n lekker glaeske of ‘ne pul beer
Oeëts de kleinste en jóngste Dan-graad halder beej Oh Do Kwan Venlo
D’n twieëde Prins beej de Moeraskwaakers in de Prinsefotogalerie dae beej de jeug en de groeëte hingk.
‘ne Prins dae geej op ‘n ledder neet op groeëte huuegte zult zeen staon
‘ne Prins dae vrindschap hoeëg in ’t vaandel haet

Beej de gratie van Vors Moerassius en ziene hoeëge wieze Raod van Elf, 45e Prins euver ós Moeraskwaakersriek in ’t jaor 2019, beejgestaon door mien kwante Adjudante Eric en Robin, gaeve heejmei te verstaon en te weite aan idderein dae de Vense Vastelaovend ’n werm hert toedruueg:

  1. Det weej gruuets zien um in ‘t Kwaakersriek mei te meuge dreie
  2. Det weej ós Residentie weer op de kop gaon zette
  3. Det dao op iddere Haciënda vuuel joeks en jen zal zien
  4. Det weej iddere kier as letste nao hoes zulle gaon
  5. Det weej ’t Ven weer gael en greun zeen kleure
  6. Det ózze kop door d’n alcohol neet tevuuel geit dreie
  7. Det d’n tied neet te hard meug vlege
  8. Det weej de ganse Vastelaovend fris en fruitig doorkómme
  9. Det weej mit zien alle dreiend door ‘t Kwaakerland gaon
  10. Det weej gruuets zien um same mit ‘t Jeugkwartet veurop te loupe deze Vastelaovend

Det weej óg allemaol nuueje veur ós receptie op 24 fibberwari in ós Residentie

Motto Trio 2019

As dreej echte Vense loupe weej veurop
En zette gans ’t Ven op de kop
Drei mit ós mei in ‘t Kwaakerland
Dan drage weej de Vense Vastelaovend op hand