A1Pentagon

Prins Remco I

Leef Moeraskwaakers en Moeraskwaakerinne,

Intelik is ’t zoeëwied en meug ik in de Vense vastelaovend veurop mit mien twieë Adjudante Jim en Tom. Veur degene die mich nog neet kinne of nog noeëts veurbeej hebbe zeen sjeze op mienen tractor: Ik bin Remco Vercoulen, 29 jaor jónk en woeënechtig mit mien leef Bliericks möpke, ós groeëtste goldstök Baer en de kleine blaag in d’n boek beej mam, op de Vaegtesstraot in ’t Ven. Sinds juni 2021 zien weej groeëtgróndbezitters van dit prachtige hoes de Nachtegaal. Nao ’n concessie te hebbe gedaon aan mien maedje um ’n paar jaor in Blierick te woeëne, is miene groeëten droum in vervölling gegaon en bin ik as Vense jóng weer blie te
woeëne wao ik vanaaf kóm. Mich kriege ze heej dus ouk neet zoeëmaar weg. Ik huur mien vrinde nog zegge: ”wie hebs se ’t in godsnaam 2,5 jaor oetgehalde aan d’n andere kant van de brök mit dien kogelvreje ves?”
Ik bin gebaore en getaoge in ’t Ven op de Schoeëlwaeg 100. Ik bin de zoon van ald Adjudant Peter Vercoulen en mien leve mam Hilda Vercoulen. Same mit mien elders trekke weej de ker van Loeënbedrief Vercoulen. Werke is veur ós ech ’n hobby, want alles waat weej doon, doon weej mit lol en plezeer. Mit ós ganse team, wao ik mega gruuets op bin, hebbe weej éin groeëte missie. Gen inkel projek is ós te groeët of te gek, want weej doon ’t allemaol. Dit hebbe weej allemaol mei gekrege van mienen opa Sjraar Vercoulen, dae d’n oprichter is van ós moeëje bedrief. Mich zuus se weinig stil zitte op de bank, altied bezig róndum ’t hoes, d’n haof of lekker
aan ’t knómmele mit ózze Baer. Maar as ik dan ens op de bank lig, dan zaet Jen altied: ”nou nou, ’t is weer zoeëwied, lekker gezellig mit mien menke op de bank”. Ik gaef um gen óngeliek. Mien ouge valle dan medein dich en Jen haet dan ’t riek veur zich allein.
Mit mien kammeräöj hebbe weej de nuuedige streke oetgehaold. Van visse schoepe oet de
viever wies door de baek kroepe beej van Rensen. Weej keke ech letterlik niks aan. Hadde de moders ós ’n eurke neet in ’t zich, dan zoge weej d’r oet wie Verkes Wullum. De snaps waal det die neet altied kóste lache um ós. Vastelaovend zit mich al vanaaf kleins aaf aan in ’t blood. Mit pap en mam leep ik ouk regelmaotig mei in de Vensen optoch. Laternao ware weej mit de jónge ald en wies zat um zelf mei te gaon loupe mit d’n optoch ónder de naam ‘De Losse Flodders’.
De beginjaore ware nog zónder vrouwluuj, toen kóste weej nog as beerfles door d’n optoch trekke. De snaps waal det die vrouwe dao neet mei akkaord ginge. Óndertösse loupe weej mit de Losse Flodders en kids in de prachtigste creaties rónd in de Veldese, Vense, Blierickse en Venlosen optoch.
Dit jaor loupe weej mit ’t Trio minder mei, maar kieke vol trots nao de groep, want waat waere zeej weer moeëj. Ik meug zeker neet vergaete te vermelde, det ik ouk nog regelmaotig bewaeg en det waal mit ald Prins Harrold I. De zuus ós waekeliks same in de sportschoeël aan de gewichte trekke. Op zóndage, as ós drökke planning ’t toeluuet, kiek ik hiel gaer mit ’n kald glaeske beer nao de moeëjste sport die ’t guuef, de Formule 1.

Ik bin gruuets det weej as Trio veurop meuge
gaon in de Vense vastelaovend. Weej make
d’r ‘ne schoeënen tied van same!

Holi Vastelaovend!


Adjudant Jim

Leef Moeraskwaakers en Moeraskwaakerinne,

Gaer stel ik mich aan óg veur: Ik bin Jim Rutten , zoon van Jac en Monique en broor van Ray (adjudant in 2022). Inmiddels 29 jaor ald en as echte Vense jóng van kleins aaf aan opgegreujd op de Richardswaeg in ’t Bölteven. Nao 27 jaor in ’t Ven gewoeënd te hebbe, woeën ik inmiddels same mit mien vrindin Pien de Swart, op de Schaopsdiekwaeg (op loupaafstand van ’t Ven). Dao hebbe weej in 2021 ’n hoes gekoch, det weej van ónder wies baove gestrip en opgeknap hebbe.
Ik werk as Supply Chain Engineer beej Canon (veur de meiste baeter bekind as Océ). In dees rol bin ik verantwaordelik veur de beschikbaarheid van serviceparts um printers in de ganse waereld aan ’t dreie te halde.
In miene vrejen tied voetbal ik in ’n vrindeteam beej FCV (same mit adjudant Tom) en hald ik d’r ouk van um te blieve hange veur de derde helf. Vaerder vind ik ’t ouk erg tóf um te reize. Pien en ik hebbe al vuuel verschillende plekke van de waereld gezeen en zulle dit ouk zeker blieve doon. Dök zeuke weej ouk plaatse oet, wao weej de meugelikheid hebbe um te kinne duike, zoeëdet weej de plaatselike ónderwaterwaereld kinne óntdekke. In de winterperiode laote weej de skivakantie neet aan ós veurbeej gaon. Mit Kersmis staon weej dan meistal op de latte en skië weej op 1 jannewari ’t nieje jaor in. Vaerder hald ik van vuuel gezelligheid en bin ik dök op ’t terras te vinde.
De (Vense) vastelaovend is mich d’r mit de paplaepel ingegaote. Vanaaf mien gebaorte heb ik gen jaor euvergeslage! Beej de Moeraskwaakers trokke weej altied mIt d’n optoch mei (iers as jónk menke mit de vrindegroep van pap en mam en later zelf mit De Losse Flodders) en beej de verschillende festiviteite bin ik zoeë noow en dan te vinde.

Ik vind ’t prachtig um in 2025 de Vense vastelaovend veurop
te meuge gaon mit Prins Remco I en Adjudant Tom.

Vastelaovend same!


Adjudant Joeksig

Leef minse oet ’t Moeraskwaakersriek.

Intelik meug geej weite wae ik bin, Tom Theelen. Dertig jaor geleje woort ik gebaore op de Schoeëlwaeg taegeneuver de melkboer. Ik bin de zoon van Jack en Carin Theelen. Miene pap kint geej vas as allerierste beermeister in ’t Moeraskwaakersriek en noow mentor van de taegeswaordige beermeisters. Ouk heb ik nog ’n aldere zus, Renee van de Wetering. ’t Ven kin ik net zoeë good as mien bóksetes. Ik bin namelik opgegreujd in ’t moeëje Kwaakersriek. Toen ik nog klein waas, kwaam ik mit mien elders en vrinde in ‘de Sabbel’. Vanoet ‘de Sabbel’ waas ’t
maar ’n klein stökske nao de frietkraom, toen waal bekind as Patrick. Waat ‘ne fijnen tied um aan truuk te dinke.
In 2023 heb ik mien vrindin Merel, liere kinne. Geej zult waal dinke, ”Wae is det dan”? Det snap ik, want het is opgegreujd in Baolder. Maar tiejes deze Holi Vastelaovend zult geej um vas liere kinne. Terwiel ik dit schrief woeën ik nog beej pap en mam. Op ’t moment det geej dit laes, bin ik verhoes en woeën ik same mit mien vrindin. En nae, helaas nog neet in ’t Ven.
In ’t dageliks laeve werk ik beej Caroz as operator. CAROZ, the control tower, is ‘ne logistieke deensverlieëner in de transportwaereld. Heej werk ik óndertösse al haos 8 jaor.
In ’t weekend bin ik dök te vinde beej FCV, de voetbalclub van ’t Ven. Van jóngs aaf aan perbeer ik ’t belke nog idder weekend in ’t net te schete. Geej heb mich meschiens waal ens herkind in d’n optoch. Deze loup ik namelik al jaore mei. Dit doon ik zoeëwaal in ’t Ven, as in Blierick, Velde en in ós stedje van lol en plezeer, Venlo. Weej begóste mit de jónge ónderling ónder ’t genot
van ’n pilske. In de loup van de jaore woort de groep groeëter en mingde weej ós same mit ‘ne groep vrindinne, die ouk altied mit d’n optoch meilepe. Óndertösse staon weej bekind ónder de naam ‘De Losse Flodders’.
Mien vrinde en femilie, dao hech ik vuuel waerd aan. Ik geneet d’r van um same leuke dinger te doon en moeëje herinneringe te make. Euver moeëje herinneringe make gespraoke, in ’t naojaor van 2025 gaon ik same mit mien maedje ’n lange reis make, wao weej al drök mei bezig zien.

Maar iers gaon weej ‘ne moeëje Holi Vastelaovend viere,
same mit Prins Remco I en Adjudant Jim.

Proos!


Proclamatie

Weej, Prins Remco d’n Ierste,

  1. Zoon van tractorkeuning Peter en kentoeërmiep Hilda Vercoulen 
  2. Getrouwd mit ’t allerleefste Blierickse maedje Jenny
  3. Pap van ózze groeëten bink Baer en dae kleine krumel in d’n boek beej mam
  4. Gruuetse baas van ‘t moeëjste bedrief in ‘t Kwaakersriek 
  5. Kleinzoon van de groeëtste kwaker oet ’t Ven (Sjraar Vercoulen) 
  6. Woeënechtig op de Vaegtes in kestieël de Nachtegaal
  7. Gebaore en getaoge op de Schoeëlwaeg
  8. In al mien laevesjaore mier door de modder gekraope dan euver de waeg geloupe 
  9. Regelmaotig róndvlegend in dae moeëje gaele Caddy
  10. Braoj- en plekkeuning van de Losse Flodders 
  11. Al jaore ‘n vas gezich in de Vensen optoch

Beej de gratie van Vors Moerassius en ziene hoeëge wieze Road van Elf, 49e Prins euver ós Moeraskwaakersriek in ’t jaor 2025, beejgestaon door mien kwante Adjudante Jim en Tom, gaeve heejmei te verstaon en te weite aan idderein dae de Vense vastelaovend ’n werm hert toedruueg: 

  1. Det weej mit óg kleur bringe aan de holi vastelaovend 
  2. Det weej same mit ‘t Jeugkwartet gaon zörge det ’t daak d’r aaf geit 
  3. Det weej mit óg neet éin, maar mierdere pilskes meuge drinke 
  4. Det weej alles en idderein door de Vensen optoch sleipe 
  5. Det weej zörge det de beermeisters noow pas ech aan ‘t werk mótte  
  6. Det weej gaon zörge det tiejes de vastelaovend gans Venlo van links nao rechs springk 
  7. Det weej neet meiloupe mit De Losse Flodders, maar waal gruuets euver eur haer kieke 
  8. Det weej noow ’t Trio zien, maar de vastelaovend as Kwartet belaeve
  9. Det weej same mit ’t Kwaakersgezelschap de Residentie op de kop zette 
  10. Det weej de geschiedenisbeuk van de Kwaakers in gaon 
  11. Det weej strakkes truuk meuge kieke op ‘ne schoeëne vastelaovend 

Vastelaovend same, klaor, hojje! 

Motto

’t Kwaakerslaeve zit ós van jóngs aaf aan in ’t blood.
Daorum viere weej de vastelaovend extra good! 

Van de Fristi, ’t snörke wies aan ’t beer.
Weej löste um noow nog steeds al te gaer! 

De tent aafbraeke is ós gegaeve. 
Det is de roeëjen draod in ós laeve! 

Vastelaovend same!