Vastelaovend in ’t Ven besteit al lang. Langer dan de Moeraskwaakers zelf. De verschillende vereiniginge die in ’t Ven gehoesves zien krege ums de beurt de meugelikheid um ‘ne Prins oet te rope veur det jaor. Ouk op de Gemmaschoeël woort en wuurt aandach aan de vastelaovend bestaejd. D’r waas toendertied ’n thema en dao op woorte de activiteite veur de kinder aafgestump. Op ’n gegaeve moment kós de vereiniging die aan de beurt waas, gen trio beejein kriege. Wim Smits (baeter bekind as Pinke) kreeg dao lóch van en vroog die club of hae dan ’n trio oet meugde rope. Dao waas gen bezwaor taege en binne ’n paar daag waas alles geregeld: op de Prinsenbal stond d’r ’n niej Prinselik Trio: ‘ne Prins mit twieë vrouwelijke Adjudante oftewaal Madjudantes. Det had in Venlo nemes, maar de mós waat doon um op te valle.

Weej hebbe dan ’t jaor 1974. Deze gank van zake zoot ‘ne gas minse aan ’t dinke. D’r woort vergaderd beej de Sabbel aan de bar en in november 1974 woort de vastelaovesvereiniging gebaore. De ierste notule woorte dan waal op d’n achterkant van ’n beerviltje gemak, de oprichting aevel ging officieel. ‘ne Notaris makde de statute en ’t ierste dageliks bestuur zörgde det de oprichting perfek waas. Neteurlik stónd d’r ‘ne naam veur de vereiniging genoteerd. Me waas ’t d’r flot euver ins det ’t waat mit ’t Ven te make meus hebbe en det ze zich wies in de stad woele laote huure: ‘ne kikker dae hard kwaek dus: ‘ne Moeraskwaaker.

Mit ’t ierste Trio vele ze al op door de vrouweliken inbring. In Casele (Castenray) wao Wim vanaaf kwaam, waas det gebroekelik. En zoeë begós d’r ’n vereiniging te óntstaon die neet mier weg te dinke is in -waat weej noow neume- stadsdeil ’t Ven. Zoeëwaal veur jónk as ald waere d’r activiteite georganiseerd, zoeëdet ’n traditie in laeve blief. D’r zien neteurlik veranderinge en aanpassinge, me mót mit d’n tied meigaon. Euver al die activiteite en weitenswaerdighede kint geej van alles vinde op dees site.