Prins Rudy I

Leef minse, ik zal mich effe veurstelle. Miene naam is Rudy Jansen, ik bin 40 lentes jónk. Zoon van Chris en Wies, breurke van Christy. Same zien weej opgegreujd baove op d’n Berg. Sinds 2002 bin ik same mit mien allerleefste Pam, in 2007 getrouwd en in ‘t Ven op de Noordervaartlaan gaon woeëne. In det jaor neteurlik ouk lid gewaore van dees prachtige vereiniging. Weej hebbe 2 kinder, Sarah van 9 en Nigel van 8.

In ‘t dageliks laeve werk ik sinds 17 jaor beej de ABN AMRO Bank. Mien huidige functie is adviseur verantwaord lieëne.

In miene vrejen tied sport ik 2 tot 3 kier in de waek beej Crossbox en bin ik dök op zóndaag te vinde beej ‘t 3e elftal van FCV. Vaerder poker ik regelmaotig en organiseer ik pokertoernooitjes beej feeszaal ‘t Ven.

Gruuets bin ik um same mit mien Adjudante Richard en Baer veurop te meuge gaon in de vastelaovend van 2018. Weej gaon d’r mit zien alle ‘ne joeksigen tied van make in ‘t Kwaakersriek en wied dao boete.

Adjudant Richard

Efkes veurstelle, ik bin Richard Sanchez, gebaore aan d’n euverkant van ’t Ven (euver de brök) in ’n ech Spaans gezin. Ik bin ‘ne zoon van Isidro (†) de Spaanse draodvlechter oet Blierick en Maria, de zörgzame moder euverste van d’n heiligen Antonius.

Ik bin officieel 39 jaor jónk (veul mich 28) en woeën sinds 2010 mit mien groeëte leefde Nikkie (haos) Sanchez op de Noordervaartlaan. Dochter van Leo, d’n ald verkuiper van Italiaanse uitekes oet Tegele en Truus, de alleskinner oet Venlo-Oeës.

Weej zien de gruuetse elders van ós schoeëne zeuns Dani van 9 en Sem van 8 jaor ald. ’n Moeëj, drök en sociaal gezin, det d’r gaer op oet geit.

Ik bin werksaam as regiomanager beej Timing Oetzendbureau en cros werkendaag’s hiel waat kilomaeters nao mien vestiginge in Venlo, Helmond en Eindhoven.

In miene vrejen tied bin ik scheidsrechter beej FCV en trainer van ’t elftal van miene groeëte vrind Sem. Hiel aaf en toe perbeer ik nog waat te sporte en gaon ik gaer (te weinig) mit mien vrinde waat drinke.

Gruuets bin ik um same mit Rudy en Baer de ker te meuge trekke in ’t Ven.

Adjudant Baer

Veur degene die mich nog neet kinne, wil ik mich effe aan óg veurstelle. Ik bin Baer Croonen, gebaore op de Jeustraot midde in Venlo. Zoon van d’n insigsten echten hierekapper Peter Croonen, ‘nen echte Venlonaer en Jeanne Croonen (†), ’n Bliericks maedje.

Ik bin 41 jaor ald en sinds 2007 officieel inwoeëner van ’t Ven. Same mit mien vruike Hilde Croonen- Hendriks van de poelier, ’n ras-ech Vens maedje, zien weej hiel gelökkig neergestreke op de Noordervaartlaan. Weej zien gruuetse elders van twieë blage die in ’t Ven gebaore en getaoge zien, ózze Julian van 9 jaor en Lauren van 7 jaor ald.

In ’t dageliks laeve bin ik same mit miene kómpenon eigenaer van werving- en selectiebureau “Careers in Motion”.

Ik miene vrejen tied bin ik regelmaotig te vinde in ’t krachhónk um te fitnesse. Daonaeve train ik elke waek ’n paar eurkes beej de Krav Maga en wil ik in ’t weekend ouk waal ens op de mountainbike stappe. Zoeë kóm ik naeve mien gezin en werk mienen tied waal door.

Gruuets bin ik det ik mit Prins Rudy I en Adjudant Richard ’t Trio meug vorme veur 2018!

Proclamatie

Weej, Prins Rudy I
Zoon van Chris van ‘t Roeëdmeuske van ‘t Helschriksel en Wies van de riesteler oet Bandung
Beschermhier van de Noordervaartlaan
Gruuetse vader van Sarah en Nigel, die beej FCV in de jeug hippe
Chocoprins van zien schatje Pam van de kienkemissie van FCV
Naef van ózze Sirremoniemeister
Prins in ’t jubeljaor van ós schoeëne vereiniging
Organisator van de kwante pokeraovende in ós Residentie “kefee feeszaal ‘t Ven”
Fanetiek betrokke beej ‘t 3e van FCV mit op tied ‘n opmerking en ‘ne lach
Vastelaovesvierder sinds zien gebaorte en ‘ne Moeraskwaaker sinds 2007
Geneter van ‘n fles Apfelkorn want ‘n glaeske is te klein
Gangmaker op idder feesje in ‘t Ven en dao boete

Beej de gratie van Vors Moerassius en ziene hoeëge wieze Raod van Elf, 44e Prins euver ós Moeraskwaakersriek in ’t jaor 2018, beejgestaon door mien kwante Adjudante Richard en Baer, gaeve heej mei te verstaon en te weite aan idderein dae de Vense vastelaovend ’n werm hert toedruueg:

  1. Det weej gruuets zien um as Trio in ’t jubeljaor veurop te meuge gaon in ós Kwaakerland
  2. Det weej verierd zien um in dit jubeljaor de vastelaovesker te meuge trekke
  3. Det weej verierd zien um de scepter euver te meuge neme van Frank IV en zien Adjudante
  4. Det weej ‘t fantastisch vinde det GEEJ d’r dit jaor beej ziet um dit mit ós te viere
  5. Det weej gruuets zien um beej d’n iersten optoch van Groeët Venlo op de wage te staon
  6. Det weej gruuets zien um same mit ‘t Jeugkwartet dit jubeljaor te viere
  7. Det weej kinne raekene op ós vruikes in deze joeksigen tied
  8. Det weej ‘t Kwaakersriek op zien gróndveste laote trille
  9. Det weej dök mit óg ‘t glaas meuge höffe
  10. Det weej euveral wao weej meuge kómme zulle kwake oet volle bors
  11. Det weej óg gaer truuk zeen op ós receptie op 4 fibberwari in ós Residentie

Motto Trio 2018

Neet van heej, maar al elf jaor hure weej d’r beej
Vier de Vense vastelaovend net wie weej
Veer kier elf, ‘n jaor mit ‘ne golde rand
Det wuurt éin groeët fees in ‘t Kwaakerland
Weej höffe ’t glaas, want weej hebbe dors
Laot ós kwake oet volle bors